જેને પિયુ મળવાનો પ્રેમ હોય તે,
                   આવો દેશ અમારે જો;
આડે અર્ણવે ઊતરી નાવડું,
                   આવે છે આરે જો. (ટેક)

દૂર બતાવે નાથને,
                  તેને પ્રગટ પાસ દેખાડું જો;
એક સદગુરુની કૃપા વડે,
                  તેને બ્રહ્મલોક પહોંચાડું જો. જેને૦

એક અચરજ મારા દેશમાં,
                  ગોવાં ને સિંહ રમે ભેળાં જો;
અવળાંનાં સવળાં થયાં,
                  કરમદીએ લાગ્યાં કેળાં જો. જેને૦

એક સદા-પૂનમ મારા દેશમાં
                અમાસ ભુવન નવ આવે જો;
શીત ને તાપ વ્યાપે નહીં,
                એક બકરો બળદને ધાવે જો. જેને૦

એક અમૃતકૂપ મારા મુલકમાં,
                તેના ભોગદારી ત્રિપુરારિ જો;
ભરે વારિ દોરી-ગાગર વિના,
                સુરતા સોહાગણ પાણિયારી જો. જેને૦

એક અઝડ ઝડે પરજન્ય પડે,
                પૃથ્વીનાં પડ રહ્યાં કોરાં જો;
પોઢ્યા હંસરાજ ચોગાન ચોતરે,
                તેને અંગે ન અડકે ફોરાં જો. જેને૦

એક કંઠ વિના ગાય નાયકા,
                ને ચર્ણ વિના તે ચાલે જો;
એક ધીર સખી પિયુ પાસ રમે,
                મહાનંદ  સુખ મહાલે જો. જેને૦