શરીર શોધ્યા વિના સાર નહિ સાંપડે

(રાગ કેદારો)

શરીર શોધ્યા વિના સાર નહિ સાંપડે, પંડિતા! પાર નહિ પામો પોથે;

તાંદુલ મેલીને તુષને વળગી રહ્યો, ભૂખ નહિ ભાગે એ ઠાલે થોથે. શ૦

રસનાના સ્વાદમાં સરવ રીઝી રહ્યા, વિગતિ ગુરુજ્ઞાન વિના રે ગૂંથે;

વાણીવિલાસમાં રંગ ન લાગ્યો રુદે, ૫રહરી વસ્ત્ર ને વળગ્યો ચૂંથે. શ૦

શબ્દ સંચ્યા ઘણા, સકળ વિદ્યા ભણ્યા, અધ્યાત્મ ઊચરે એ જ પોતે;

પ્રપંચ પંડમાં રહ્યો, અહંકાર નવ ગયો, અનંત જુગ વહી ગયા એમ જોતે. શ૦

શાસ્ત્ર કીધાં કડે, (તોય) રજનીમાં આથડે, અંધ થૈ સંચરે શૈલ્ય ઓથે;

ભણે નરસૈંયો જે ભેદ જાણી જુઓ, મેં તો રચી કહ્યું પદ ચોથે. શ૦

shariir shodhyaa vinaa saar nahi saampde