ઊંચ-નીચનો ભેદ કાઢો

તો નૂરીજન નજરે આવે રે,

અઢાર વરણ એક જ પ્યાલે

અમીરસ મોજું માણો રે.

અંતર વિના અવિનાશી રીઝે નહીં, પ્રગટ પ્યાલે ભાળો રે,

ચૌદ બ્રહ્માંડથી ન્યારો ખેલે, પ્રેમે વ્હાલો બિરાજે રે.

ઊંચ-નીચનો ભેદ કાઢો...

મીઠા અમીરસ દૂર કરી, આઠ પહોર આનંદમાં મ્હાલે રે,

પ્રેમ તણી લગની લાગી, અણુ-અણુમાં જ્યોત જાગે રે.

ઊંચ-નીચનો ભેદ કાઢો...

ઉત્તમ-મધ્યમ એક છે, શીદને કરો છો તાણાવાણી રે,

રજો સતો તમોને જાણો, માયલા કાળિંગાને મારો રે.

ઊંચ-નીચનો ભેદ કાઢો...

દુઃખ સુખ આવે ને જાવે, ગુરુ ગોવિંદના ગુણ ગાવે રે,

ગુરુના ચરણે 'પંખી' ગાવે, દુઃખમાં કોઈ હરિ અજમાવે રે.

ઊંચ-નીચના ભેદ કાઢો...