ભાઈઓ, ભરમ ન ભૂલીયે

ભાઈઓ, ભરમ ન ભૂલીયે

ભાઈઓ, ભરમ ન ભૂલીયે

ભાઈઓ, ભરમ ન ભૂલીયે, માયા મૃગજલ રૂપ રે;

સંસાર સ્વપ્ન સમતુલ્ય છે, સત્ય બ્રહ્મસ્વરૂપ રે. ભાઈઓ.

રૂપ–નામ સ્થિરતા નહીં, જ્યમ નહીં રજ્જુભુજંગ રે;

શુક્તિ–રજત વર્ણ–આશ્રમ, તેહ શું કીશો પ્રસંગ રે. ભાઈઓ.

ભૂત ભવિષ્ય (ને) વર્તમાન, એ પદારથ (જ) ચાર રે;

વ્યોમકુસુમવત જાણજ્યો (જે) જન્મ–મરણ–અવતાર રે. ભાઈઓ.

મને કલપી જે જે કહ્યું, નામ માત્ર તાં તેહ રે;

શશકશૃંગ વંધ્યા–સુત, તેહ શું કીધો સનેહ રે. ભાઈઓ.

અણકલપ્યું અવિનાશ છે, તે તો પદ નિર્વાણ રે;

આપે આપ લ્યો ઓલખી, એ અનુભવ પ્રમાણ રે. ભાઈઓ.

જાણનહારાને જાણજ્યો, જાણો જાણવું છે એહ રે;

કહે નરહરિ એ ઓલખે, ટલે સર્વ સંદેહ રે. ભાઈઓ.

(નરહરિ–કૃત ‘જ્ઞાનગીતા’માંથી)

bhaio, bharam na bhuuliye