સંસારિયામાં કોણ તારું છે સાચું

કોણ તારું છે સાચું, સંસારિયામાં કોણ તારું છે સાચું.

કાયા–માયા સુત ને નારી, ખોટામાં થયો ખુવારી,

ગાયા નહીં ગિરધારી રે. – સંસારિયામાં૦

મન ગમતો તું તો મહાલ્યો, ચોરનો મારગ ઝાલ્યો,

પાપીડાને સંગે ચાલ્યો રે. – સંસારિયામાં૦

કૂડું કૂડું કામ કીધું, તેને સાચું માની લીધું,

અંતકાળે દુઃખ દીધું રે. – સંસારિયામાં૦

જીતી બાજી હાર્યો જાણી, મુખે બોલ્યો મિથ્યા વાણી,

ધાન્ય કીધું ધૂળ ધાણી રે. – સંસારિયામાં૦

વિષ વેલા વ્હાલા કીધા, ઝેરના પીઆલા પીધા,

પ્રભુને વિસારી દીધા રે. – સંસારીયામાં૦

ઘર ધંધે ઘેરી લીધો, કામિનીએ વશ કીધો,

‘મીરાં’ કહે તને દગો દીધો રે. – સંસારિયામાં૦

Sansariyama kon taru che sachu