રાખ ભવસિંધુના અતાગ મહા ભય થકી નામ-નારાયણ નાવ મેલી

રાખ ભવસિંધુના અતાગ મહા ભય થકી નામ-નારાયણ નાવ મેલી;

ઘોર ભવસિંધુની વેળની રેલમાં મહેરના પવનને મેલ ઠેલી. રા૦

વિષય-તૃષ્ણાહરો, મોહ મન ના ધરો, હું ને મારું જગત તેમાં બૂડો;

તું થકી વેગળા આસુરીમાં ભળ્યા, શરણ આવ્યા જેનો અખંડ ચૂડો. રા૦

સુખ તો અલ્પ ને દુઃખ સાગર જસું, જન્મિયો જંતુ તે જન્મરોગી;

એક નિશ્ચે તારા નામનો આશરો, હશે કોઈ વીરલો તેનો ભોગી. રા૦

કલેશ આ વિશ્વના તાપ નિવારવા મંગલ શ્રીકૃષ્ણનું નામ જાણો;

બેઉ કર જોડીને નરસૈંયો વીનવે : ભવજળ બૂડતાં બાંહે તાણો. રા૦

raakh bhavsindhunaa ataag mahaa bhay thakii naam-naaraayan naav melii