પ્યાલો પ્રેમનો

પ્યાલો પ્રેમનો

પ્યાલો પ્રેમનો, પ્યાલો પ્રેમહૂંદો પાયો,

જનમ મરણ વાકો ન આવે,

સદ્‌ગુરુ ચરણે, સદ્‌ગુરુ ચરણ મેં આયો,

મનમતવાલો પ્યાલો ચાખિયો, પ્યાલો પ્રેમનો૦

ગુરુજી! બંક રે નાળે જે દિ’ ધમણું ધમે,

બ્રહ્મ અગનિ, બ્રહ્મ અગનિ પ્રજાળી,

ઇંગલા, પિંગલા, સુખમણા,

ત્રિપુટીમાં લાગી તાળી –

મનમતવાલો પ્યાલો પ્રેમનો૦

ગુરુજી! શૂન્ય શિખર પર ભઠ્ઠી જલે,

વરસે અમીરસ, વરસે અમીરસ ધારા,

એકલ કુંવારી પ્યાલો ભર દેવે,

સાન સુરતાએ ભર પાયા –

મનમતવાલો પ્યાલો પ્રેમનો૦

ગુરુજી! વિના પાટે, વિના કોળિયો,

ગ્રંથ વિના જાગી, ગ્રંથ વિના જાગી જ્યોતિ,

સૂરજ ચંદ્ર દોનું સાખિયા,

સનમુખ રે’વે સમેતિ –

મનમતવાલો પ્યાલો પ્રેમનો૦

ગુરુજી! ગગન ગાજે ને ધૂર્યું દિયે,

ભીંજાય ધરણી, ભીંજાય ધરણી અંકાશા,

આગમ વાણી બાવો ઓચર્યા,

ઓચર્યા ‘લખીરામ’ દાસા –

મનમતવાલો પ્યાલો પ્રેમનો૦

pyaalo premno