રેખ્તા
હિન્દવી
સૂફીનામા
રાજસ્થાની
નિરખને ગગનમાં
nirakhne gaganman
નરસિંહ મહેતા
નરસિંહ મહેતા
(રાગ કેદારો)
નિરખને ગગનમાં કોણ ઘૂમી રહ્યો? 'તે જ હું', 'તે જ હું' શબ્દ બોલે;
શ્યામનાં ચરણમાં ઈચ્છું છું મરણ રે, અહીંયાં કો નથી કૃષ્ણતોલે. નિ૦ ૧
શ્યામ-શોભા ઘણી, બુદ્ધિ નવ શકે કળી, અનંત ઓચ્છવમાં પંથ ભૂલી;
જડ અને ચેતન રસ કરી જાણવો, પકડી પ્રેમે સજીવંન મૂળી. નિ૦ ર
ઝળહળ જ્યોત ઉદ્યોત રવિ કોટમાં, હેમની કોર જ્યાં નીસરે તોલે;
સચ્ચિદાનંદ આનંદ ક્રીડા કરે, સોનાના પારણા માંહી ઝૂલે. નિ૦ ૩
બત્તી વિણ, તેલ વિણ, સૂત્ર વિણ જો વળી,
અચળ ઝળકે સદા વિમળ દીવો,
નેત્ર વિણ નિરખવો, રૂપ વિણ પરખવો,
વણજિહ્વાએ રસ સરસ પીવો. નિ૦ ૪
અકળ અવિનાશીએ, નવ જાયે કળ્યો, અરધ-ઊરધની મધ્યે મહાલે;
નરસૈંયાચો સ્વામી સકળ વ્યાપી રહ્યો, પ્રેમના તંતમાં સંત ઝાલે. નિ૦ પ
સ્રોત
- પુસ્તક : નરસિંહ મહેતાના શ્રેષ્ઠ પદ
- સંપાદક : શીવલાલ જેસલપુરા
- પ્રકાશક : નવભારત સાહિત્ય મંદિર
- વર્ષ : 1997