નંદના નંદ-શું નેહ જેને નહીં

(રાગ કેદારો)

નંદના નંદ-શું નેહ જેને નહીં, તે રે માનવ ખર-શ્વાન તોલે;

ભૂતળ ભાર કરવાને એ અવતર્યા, પ્રેતની પેરે સંસાર ડોળે. નંદ૦

દૃષ્ટિથી તે ટળો, ભોગ તેહના બળો, શલ્ય પડો તેહના સુખ માથે;

જીવતા નર તે તો શબ સમા જાણવા, જેહનું ચિત્ત નહીં કૃષ્ણ સાથે. નંદ૦

કીર્તિ શ્રીકૃષ્ણની જીભથી નવ ભણે, તેહને મુખ દીજે રે તાળું;

ભણે નરસૈંયો : હરિ જેને વહાલા નહીં, તે તણું કુટુંબ સદાય કાળું. નંદ૦

nandnaa nand-shun neh jene nahiin