રેખ્તા
હિન્દવી
સૂફીનામા
રાજસ્થાની
રણ તો ધીરાનું ધીરાનું, નહિ ઉતાવળા કાયરનું.
ધીર વીર જે હોય તે જ ખૂબ, સંકટ સામો થાયે;
પ્હાડ પઠે રણમાં રહે ઊભો, લેશ નહિ ગભરાયે. રણ તોo
ધીર વીર કો પ્રસંગ શોધે, સ્હેવા કષ્ટો ભારે;
જાણી જોઇને આફત હોરે, રાજી ઘા લે ત્યારે. રણ તોo
થતે બાવરાં ઉતાવળાં રે, હાર થાય છે મોટી;
વિના કારણે ઘાત થાય ને, જાય કનેથી લોટી. રણ તોo
કાયર થઇને નાસી જાતાં, અધવચ મૃત્યુ ઝાલે;
એ મરવાના કે રણમાં, કર્તાં કાં ના મરવું ભાલે? રણ તોo
ડાહ્યો તે દેશાવર વેઠે, જ્ઞાની બહુ અથડાયે;
ધીરવીરના પગ સંકટમાં, કદી નહિ લથડાયે. રણ તોo
ધાર્યું મેળવે વા ટેકી રેહે, વા તે મૃત્યુ પામે;
ત્રણેથી તેને જસ છે, શત્રુ ધન્ય કહે સામે. રણ તોo
પ્રપંચરણમાં બહુ સપડાવે, મોટા ત્રણે તાપો;
શૂર વીર જન કળે વળેથી, મારે તે પર છાપો. રણ તોo
ભણી વધારો જોસ્સા સહુ જન, પણ કબજામાં રાખો;
પ્હેલે એ જીતી જાણો તો, શત્રુ નીચે નાખો. રણ તોo
જાણી જોઈ ના સંકટ હોરો, સંકટમાં ના બીહો;
કહે નર્મદ સહુ ધીરવીર થઈ, જસ લઈ જાગ જુગ જીવો.રણ તોo
સ્રોત
- પુસ્તક : શ્રેષ્ઠ નર્મદ (પૃષ્ઠ ક્રમાંક 44)
- સંપાદક : રમણ સોની
- પ્રકાશક : ગૂર્જર ગ્રંથરત્ન કાર્યાલય
- વર્ષ : 2023