માતાને મોહન ધાવે

માતાને મોહન ધાવે

માતાને મોહન ધાવે, અતીશે લાગે મીઠું રે;

ચુલે પય ઉભરાવા લાગ્યું, યશોદાએ તે દીઠું રે. માતાને...

અધ ધાવતો મૂક્યો અવની, જનની વેગે ચાલી રે;

આંખે અતિ ખરતાં આંસુ, હરજીએ છેડલે ઝાલીરે. માતાને...

અતિ આકળી થઈ નીસરી, બળ કરી વછોડી રે;

ડંસ લેઇ ગોવિંદે તે વારે, મહીની ગોળી ફોડી રે. માતાને...

પૂર નદીની પેરે ચાલે, હરજી સુખે માખણ ખાય રે;

ઊતારીને આવે જેટલે, તેટલે કૌતુક દીઠું માયરે. માતાને...

બાળક માંકલડાંને ખવરાવે, નાચે પ્રેમે મુદિત થાય રે;

જનનીને આવતી જાણી, ભયભીત થઈ નાસી જાય રે. માતાને...

કામિની કર માંહે લઇ, ચીમટા પુંઠે થાય રે;

સાસ ભરાયે ભાલણ પ્રભુ, લીલા બ્રહ્માદિક ગાયરે. માતાને...

mata ne mohan dhave re