મારે ઘેર આવજો માવા, મઠાં ને કોદરી ખાવા

મારે ઘેર આવજો માવા, મઠાં ને કોદરી ખાવા.

કઢીમાં તો કર બોળીને, સૈડકા સૈડાસૈડ;

મુખડું મીઠું થાય રે માવા, પ્રીતે પાપડ કઈડ. મારે...

આંબલીની તો કઢી કરી છે, માંહી મઠાંની દાળ;

છાંટો નાખું શામળા, તું તો ભાણું સામું ભાળ. મારે...

ભાવના ભૂખ્યા છો ભૂધરજી, ગુણ મને લાધ્યા;

સંસેક પેલા સુદામાના તાંદુલ તમે ખાધા. મારે...

કાંગ માટે કહાનજી તમે વિપ્રને કીધો રાજી;

કરમાબાઈનો કૂર ખાધો, ખાધી વિદુરની ભાજી. મારે...

શરમાઓ તો શામળા, તમને મારા સમ;

એકાંતે આવો એકલા, કોઈ નથી બીજું અન્ય. મારે...

ભૈડકાનો તો ભાવ થયો છે. ભૈડકું ઝીણું ભઈ;

મોળી છાશમાં માવજી રે, તું નાનું કેરું કઈડ. મારે...

પાંચકણીની પૂરી કીધી, પાશેર મેલ્યું દૂધ;

નાનાના સ્વામી જમી ઊઠીને, કરજો કૂદાકૂદ. મારે...

રસપ્રદ તથ્યો

કૂર - રાંધેલા ભાત, પાંચકણીની - પાંચ પ્રકારના અનાજ ભેગાં કરીને

mare gher aavajo mava, matha ne kodri khava