મારકુંડ કહે છે તમે સાંભળોને યુધિષ્ઠિર રાય

મારકુંડ કહે છે તમે સાંભળોને યુધિષ્ઠિર રાય,

સતની વાતું વીરા હું કહું હાં હાં;

સતની બાંધી માતા પૃથ્વી રે હાં,

સતના બાંધ્યા શેષનાગ છે... હાં હાં૦

સતના બાંધ્યા મારા હરિજન,

તારે સતના બાંધ્યા રૂડા સાધ છે;

સતવાદીએ સત ધરમ ચલાવ્યો રે હાં,

અને ઋષિ અઠાસી હજાર મળી... હાં હાં૦

પણ ઇંદ્રને ઇંદ્રાણી મળી, બ્રહ્માને બ્રહ્માણી મળી;

ત્યારે અલખ વધાવ્યો સાચે માતીએ,

ક્રોડ તેત્રીસ મળી જગત રચાવ્યો રે;

અને તેજોમાં અલક આવિયા... હાં હાં૦

પણ જોતી સરૂપી નર પાટ પર પધાર્યા,

ત્યાં નર નકળંગી બાવો આવિયા;

જેના જગનમાં ગંગાજી પધાર્યાં રે,

હીંડે કોળી વાળતાં... હાં હાં૦

પણ જેના જગનમાં સતી દ્રોપદી પધાર્યાં,

તો હીંડે કોળી પ્રેાસાળ વેંચતાં;

આ ધર્મ આદ્ય અનાદિનો રે,

અને દેવતાઓએ પ્રગટ કર્યો... હાં હાં૦

કહે ઋષિ મારકુંડ સુણો રાજા યુધિષ્ઠિર;

આ ધર્મ મરજીવા તણો તે;

અનુભવિયાને પરવશ પડ્યો... હાં હાં૦

maarkund kahe chhe tame saambhalone yuthishthiir raay