ક્યાં ગયો મોરલીવાળો

ક્યાં ગયો મોરલીવાળો

ક્યાં ગયો મોરલીવાળો અમારા ઘૂંઘટ ખોલી રે?

ક્યાં ગયો વાંસળીવાળો, અમને રંગમાં રોળી રે. ક્યાં...

હમણાં વેણી ગૂંથી હૂતી, પે'રી કસુંબલ ચોળી રે;

માત જસોદા સાખ પૂરે છે, કેસર છાંટ્યાં ઘોળી રે. ક્યાં...

જળ જમુનાનાં ભરવા ગયાં'તાં, બેડું નાખ્યું ઢોળી રે;

પાતળિયો પરપંચે ભરિયો, અમે તે અબળા ભોળી રે. ક્યાં...

પ્રેમ તણી પ્રેમદાને અંતર, ગેબની મારી ગોળી રે;

બાઈ મીરાં કે પ્રભુ ગિરિધર નાગર, ચરણકમલ ચિત ચોડી રે. ક્યાં...

Kya Gayo Moralivalo