રેખ્તા
હિન્દવી
સૂફીનામા
રાજસ્થાની
ખબરદાર મનસૂબાજી, ખાંડાની ધારે ચડવું છે;
હિમ્મત હથિયાર બાંધી રે, સત્ય લડાઈએ લડવું છે.
એક ઉમરાવ ને બાર પટાવત, એક એક નીચે ત્રીસ ત્રીસ,
એક ધણી ને એક એક ધણિયાણી, એમ વિગતે સાતસેંને વીસ;
સો સરદારે ગઢ ઘેર્યો રે, તેને જીતી પાર પડવું છે.
પાંચ પ્યાદલ તારી પૂંઠે ફરે છે, ને વળી કામને ક્રોધ,
લોભ મોહ માયા ને મમતા, એવા જુલમી જોરાવર જોધ;
અતિ બલિષ્ટ સ્વારી રે, તે સાથે આખડવું છે.
પ્રેમ પલાણ કરી, જ્ઞાન ઘોડે ચઢી, સદ્ગુરુ શબ્દ લગામ,
શીલ સંતોષ ને ક્ષમા ખડગ ધરી, ભજન ભડાકે રામ;
ધર્મ ઢાલ ઝાલી રે, નિર્ભે નિશાને ચડવું છે.
સૂરત નૂરત ને ઈડા પિંગળા, સુખમણા ગંગા સ્નાન કીજે,
મન પવનથી ગગન મંડળ ચઢી, ધીરા સુધા રસ પીજે;
રાજ ઘણુ રીઝે રે, ભજન વડે ભડવું છે.
સ્રોત
- પુસ્તક : કાવ્યપરિચય ભાગ 1 (પૃષ્ઠ ક્રમાંક 80)
- સંપાદક : રામનારાયણ વિ. પાઠક, નગીનદાસ ના. પારેખ
- પ્રકાશક : નવજીવન પ્રકાશન મંદિર, અમદાવાદ
- વર્ષ : 1939
- આવૃત્તિ : બીજી આવૃત્તિ, ત્રીજું પુનર્મુદ્રણ