જ્યાં લગી આતમાતત્ત્વ ચીન્યો નહીં

(રાગ કેદારો)

જ્યાં લગી આતમાતત્ત્વ ચીન્યો નહીં, ત્યાં લગી સાધના સર્વ જૂઠી;

મનખા દેહ તારો એમ એળે ગયો, માવઠાની જેમ વૃષ્ટિ વૂઠી. જ્યાં૦ ૧

શું થયું સ્નાન, સંધ્યા ને પૂજા થકી? શું થયું ઘેર રહી દાન દીધે?

શું થયું ધરી જટા ભસ્મ લેપન કર્યે? શું થયું વાળ લુંચન કીધે? જ્યાં૦ ર

શું થયું જપ-તપ-તીરથ કીધા થકી? શું થયું માળ ગ્રહી નામ લીધે?

શું થયું તિલક ને તુલસી ધાર્યા થકી? શું થયું ગંગજળ-પાન કીધે? જ્યાં૦ ૩

શું થયું વેદ-વ્યાકરણ-વાણી વદ્યે, શું થયું રાગ ને રંગ માણ્યે?

શું થયું ખટદર્શન-ભેદ સેવ્યા થકી? શું થયું વરણના ભેદ આણ્યે? જ્યાં૦ ૪

એ છે પરપંચ સહુ પેટ ભરવા તણા, જ્યાંહાં લગી ના પરિબ્રહ્મ જોયો;

ભણે નરસૈયોઃ તત્ત્વદર્શન વિના રત્નચિંતામણિ જન્મ ખોયો. જ્યાં૦ પ

jyan lagi atmatattw chinyo nahin