જી રે લાખા મૂળ રે વચનનો મહિમા

જી રે લાખા મૂળ રે વચનનો મહિમા બહુ મોટો જી,

એને સંત જ વિરલા જાણે હાં,

જી રે લાખા વચન થકી જે કોઈ અધૂરા જી,

તે તો પ્રેમરસને શું માણે હાં.

જી રે લાખા વચન થકી બ્રહ્માએ સૃષ્ટિ રચાવી જી,

વચનેથી પ્રથવી ઠેરાણી હાં,

જી રે લાખા ચૌદ લોકમાં વચન રમે છે જી,

તેને જાણે પુરુષ પુરાણી હાં...

જી રે લાખા એવા રે વચનની જેને પ્રતીત આવે જી,

એ તો કદી ચોરાશી ના જાવે જી હાં,

જી રે લાખા વચનના કબજામાં જે કોઈ વર્તે જી,

એની સુરતા શૂન્યમાં સમાવે હાં...

જી રે લાખા એ રે વચન તો શિરને સાટે જી,

એ ઓછા માણસને ના કહેવું હાં,

જી રે લાખા સદ્‌ગુરુ આગળ શીશ નમાવી જી,

એના હુકમમાં હમેશાં રહેવું હાં...

જી રે લાખા આદ ને અનાદમાં વચન છે મોટું જી,

એને જાણે વિવેકી પૂરા હાં,

જી રે લાખા શેલર્ષીની ચેલી સતી ‘લોયણ’ બોલ્યાં જી,

એને નેણે વરસે નૂરા હાં...

jii re laakhaa mul re vachanno mahimaa