જે ગમે જગતગુરુ દેવ જગદીશને

(રાગ કેદારો)

જે ગમે જગતગુરુ દેવ જગદીશને, તે તણો ખરખરો ફોક કરવો;

આપણો ચિંતવ્યો અર્થ કંઈ નવ સરે, ઊગરે એ જ ઉદ્વેગ ધરવો. જે૦ ૧

‘હું કરું, હું કરું' એ જ અજ્ઞાનતા, શકટનો ભાર જેમ શ્વાન તાણે;

સૃષ્ટિ-મંડાણ છે સર્વ એણી પેરે, જોગી-જોગેશ્વરા કોઈક જાણે. જે૦ ર

નીપજે નરથી તો કોઈ નવ રહે દુઃખી, શત્રુ મારીને સહુ મિત્ર રાખે;

રાય ને રંક કોઈ દેષ્ટે આવે નહીં, ભવન ભવન પર છત્ર દાખે. જે૦ ૩

ઋતુ-લતા-પત્ર-ફળફૂલ આપે યથા, માનવી મૂર્ખ મન વ્યર્થ શોચે;

જેહના ભાગ્યમાં જે સમે જે લખ્યું, તેહને તે સમે તે જ પહોંચે. જે૦ ૪

સુખ સંસારી મિથ્યા કરી માનજો, કૃષ્ણ વિના બીજું સર્વ કાચું;

જુગલ કર જોડી-કરી-નરસૈંયો એમ કહેઃ જન્મ-પ્રતિજન્મ હરિને જ જાચું. જે૦ પ

je game jagataguru dew jagdishne