જાગો રે અલબેલા કા'ના

જાગો રે અલબેલા કા'ના, મોટા મુકુટધારી રે;

સહુ દુનિયા તો સૂતી જાગી, પ્રભુ, તમારી નિદ્રા ભારી રે. જાગો રે...

ગોકુળ ગામની ગાયો છૂટી, વણજ કરે વેપારી રે;

દાતણ કરો તમો આદિ દેવા, મુખ ધુઓ મોરારિ રે. જાગો રે...

ભાતભાતનાં ભોજન નિપાયાં, ભરી સોવરણથાળી રે;

લવંગ, સોપારી ને એલચી, પ્રભુ પાનની બીડી વાળી રે. જાગો રે...

પ્રીત કરી ખાઓ પુરુષોત્તમ, ખવડાવે વ્રજની નારી રે;

કંસની તમે વંશ કાઢી, માસી પૂતના મારી રે. જાગો રે...

પાતાળે જઈ કાળીનાગ નાથ્યો, અવળી કરી અસવારી રે;

મીરાં કે પ્રભુ ગિરિધર નાગર, હું છું દાસી તમારી રે. જાગો રે...

Jago Re Albela Kana