હું તો પરણી મારા પ્રીતમની સંગાથ

હું તો પરણી મારા પ્રીતમની સંગાથ,

વહાલમજી, હું તો પરણી...

બીજાનાં મીંઢળ નહીં રે બાંધું, હું તો પરણી...

ચારે ચારે જુગની વહાલે, ચોરીઓ ચિતરાવી રે હાં;

વહાલમજી, હું તો મંગળ વરતી છું બે ને ચાર. બીજાનાં...

રાજસી ભોજન રાણા, જમવાં નથી રે;

વહાલમજી, અમે પ્રેમના ટુકડા માગી ખાશું રે. બીજાનાં...

મોતીની માળા રાણા, કામ ન આવે રે હાં;

વહાલમજી, અમે તુલસીની માળા પહેરી રહીશું રે. બીજાનાં...

હીર તણાં ચીર મારે, કામ ન આવે રે હાં;

વહાલાજી, અમે ભગવાં પહેરીને નિત્ય ફરશું રે. બીજાનાં...

બાઈ મીરાં કે પ્રભુ ગિરિધર નાગર હાં;

વહાલમજી, હું તો તમને ભજીને થઈ છું ન્યાલ રે. બીજાનાં...

Hu To Parni Mara Pritam ni Sangath