હોલો હોલી કહે છે રે

હોલો હોલી કહે છે રે

હોલો હોલી કહે છે રે, પ્રભુજી મારી વહારે ચઢો;

બચ્ચાં મારાં માંહે રે, તળે આવી ભીલ ખડો.

બાણ તાણીને ઊભો પારધી, ઉપર આવ્યો બાજ;

પોલારમાંથી સર્પ નીસરિયો, તેણે તો સરી ગયાં કાજ :

ગરુડનો ગામી રે, હરિ બિરદદાર બડો. હોલો...

વિનતિ સુણી વિઠ્ઠલ પરવરિયા, સાપ માટે નિરવાણ;

બિલને ઠેસતાં પારધીના, તતક્ષણ લીધા પ્રાણ :

બાણ ત્યાંથી છૂટ્યું રે, બાજ આવી હેઠો પડ્યો. હોલો...

જુઓ હરિ કેવા સંકટમોચન, બચ્ચાં બચાવ્યાં કૃપાળ;

કાળું કરનારનું કરતો કાળું, એવો એ દીનદયાળ :

કાળનો કાળ કાળો રે, પ્રહ્લાદની વહારે ચડ્યો. હોલો...

કઠણ વેળાએ કારજ કરશે, ભજન કરો ભય જાય;

સ્વામીસેવાનું ફળ અમોલે, અંત સમે કરે સહાય :

થાય હરિ ઊભો રે, કદી કાળ સામો તડૂક્યો. હોલો...

holo holi kahe chhe re