રેખ્તા
હિન્દવી
સૂફીનામા
રાજસ્થાની
હીરાની પરીક્ષા રે, ઝવેરી હોય તે જાણે,
મૂરખ મનમાં મોહ્યા રે, અજાણ્યે ઊતરણી આણે... હીરાની૦
મગ મરી બરોબર મૂરખ જાણે, ગોળ-ખાંડ એક ઘાટ,
પુષ્પની વાસના પત્ર ન જાણે, એવો જગત-ભગતનો ઠાઠ,
સો વાર સમજાવું રે, પતિત તોયે નવ આણે... હીરાની૦
મૂરખહાથે હીરલો લાધ્યો, તે છાણ સાથે વેચાય,
કોઈક જાણ મળ્યો તેણે ઝડપી લીધો, તો તેની કિંમત થાય,
ગુણ ગાય જ વિરલા રે, પૂરણ તે તો પરમાણે... હીરાની૦
ભગત થયા પણ ભેદ ન જાણ્યો, કરે તરવારનો ઉપાય,
તન ભોગી મન કંચન કામની, એવે તરણે કેમ ઊતરાય?
ઘરધંધાની ઘાણી રે, તેમાં તેલિયા તાણે... હીરાની૦
જાગ જગન જપ તપ ને તીરથ, તેમાં સહુથી મોટો સતસંગ,
સૂકી ડાળે વેલ થઈ રસ પી લે, તોય અધૂરો રહ્યો બાળ ભોરિંગ,
'ધીરા' શોધ્ય હીરો રે, રાત દિવસ વહાણે... હીરાની૦
સ્રોત
- પુસ્તક : પરિચિત પદસંગ્રહ (પૃષ્ઠ ક્રમાંક 174)
- પ્રકાશક : સસ્તું સાહિત્યવર્ધક કાર્યાલય
- વર્ષ : 1946
- આવૃત્તિ : ત્રીજી આવૃત્તિ