રેખ્તા
હિન્દવી
સૂફીનામા
રાજસ્થાની
હરિજન હોય તેણે હેત ઘણું રાખવું,
નિજ નામ ગ્રહીને નિર્માન રહેવું;
ત્રિવિધના તાપને જાપ જરણા કરી,
પરહરી પાપ રામ નામ લેવું... હરિજન૦
સર્વથી નરસ રહી સરસ સહુને કહી,
આપ આધીન થઈ દાન દેવું;
મન કર્મ વચને કરી નિજ ધર્મ આદરી,
દાતા ભોક્તા હરિ એમ કહેવું... હરિજન૦
અડગ ન ડોલવું અધિક ન બોલવું,
ખોલવી ગુંજ તે પાત્ર ખોળી;
દીન વચન દાખવું ગંભીરપણું રાખવું,
વિવેકીને ન કરવી વાત પોળી... હરિજન૦
અનંત નામ ઉચ્ચારવું તરવું ને તારવું,
રાખવી ભક્તિ તે રાંક દાવે;
ભક્ત ભોજો કહે ગુરુપ્રતાપથી,
ત્રિવિધના તાપ તેને નિકટ ના’વે… હરિજન૦
સ્રોત
- પુસ્તક : ભોજા ભગતની વાણી (પૃષ્ઠ ક્રમાંક 100)
- સંપાદક : મનસુખલાલ સાવલિયા
- પ્રકાશક : પ્રવીણ પ્રકાશન
- વર્ષ : 2001
- આવૃત્તિ : દ્વિતીય આવૃત્તિ