હરિ તુને પ્રસંન તે ક્યમ થાયે,

તારા મનનું કપટ ન જાય;

તારા દિલનો છળ નવ જાય,

પ્રભુ તને પ્રસંન તે કેમ થાય. ટેકo

હરિકીર્તન હરિનામ રટણમાં,

અતિસેં આળસ તારે;

ડાચાકૂટ લવ પરનિંદામાં,

આખો દિવસ ન હારે. હરિo

પ્રભુનું પૂજન કરતી વેળા,

કાયા તાકી કંપે;

ગંજીફો સોકટાં કૂટતાં,

આઠે પહોર ન ઝંપે. હરિo

પ્રભુનું ચંદન નવ ઘસાય,

તુજ શ્રમથી શરીર બગડે;

કૂંડી કૂતકે મરી મસાલે,

ભાવે ભાંગ તું રગડે. હરિo

એકાદશી ઓચ્છવનું જાગરણ,

અતિ અઘરું તે લાગે;

ભવાઈ કે ગુણકાનૃત્ય જોવા,

જામિની આખી જાગે. હરિo

બે પૈસાની ગુરુ સેવા બતાવે,

ત્યાં ગણગણતું બોલે;

ઘરની સ્ત્રી સહેજ માગે ઘરેણું,

ત્યારે હરખમગન થઈ ડોલે. હરિo

ખોટાં મોતી કાચ કીડિયાં,

ભગવત ભૂષણ ઘાલે;

સોનું રૂપું મણિ મુક્તા વિના,

સ્ત્રી સુતને ના ચાલે. હરિo

હરિના ભક્તને લૂખું સૂકું,

વેઠ વળગી હોય જાણે;

સગાં સંબંધી ઘેર પરોણા આવે,

મિષ્ટાન્ન પીરસે ભાણે. હરિo

જગ દેખે ત્યાં જગને બેસે,

બાકી ના’ય ના ખાવા;

ગળાં કાપે ક્યમ થાએ ગળગળો,

એ વૈષ્ણવતા વાહવા. હરિo

આ કરવું આ ના કરવું,

એમ સહુને શિક્ષા દે છે;

તેમાંનુ તું કાંઈ નથી કરતો,

અનુચિત કર્મ કરે છે. હરિo

અંતરનો છળ અન્ય ન લેહે,

પણ જાણે અંતરજામી;

એ તો સાચાના સંગી છે,

દાસ દયાના સ્વામી. હરિo