હરિ આવ્યા છે નારીના વેશે રે

હરિ આવ્યા છે નારીના વેશે રે, એને કોઈ જુઓ રે;

શિવ-બ્રહ્મા જેનું ધ્યાન ધરે છે, તેને જોઈ જોઈ દુખડાં ખુઓ રે.

હરિ૦

માત-પિતા એનાં મનમાં વિમાસે : કહો, એ ક્યાં થકી આવી રે?

અચરત સરખું સહુને ભાસે : એ જલઝારી ક્યાંથી લાવી રે?

હરિ૦

બંધવ એનો તત્ક્ષણ ઊઠ્યો, આવ્યો મંદિર જાણી રે;

રતનબાઈ ઘણું વ્યાકુળ ફરે છે : 'તમે લ્યોને, મહેતાજી! પાણી રે.'

હરિ૦

પરમેશ્વરે પુત્રી કરી જાણી, સભા મધ્યે આણી રે;

અંતર્ધાન થયા અલબેલો, વાત સહુ કોએ જાણી રે.

હરિ૦

જયજયકાર થયો જગ માંહે, હરખ વાધ્યો હૈયે રે;

નરસૈયાચો સ્વામી ભલે મળિયો, એનાં ચરણકમળમાં રહીએ રે.

હરિ૦

haarii aavyaa naarii veshe