રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો
રજિસ્ટ્રેશન કરો
રેખ્તા
હિન્દવી
સૂફીનામા
રાજસ્થાની
નરસિંહ મહેતા
આ શો ચતુરાના ચિત્તનો ચાળો રે! એને કોઈ નિહાળો રે. ટેક
બ્રહ્માએ નથી ઘડી ભામિની, એ તો આપે બનીને આવી રે;
ત્રણ લોકમાં નહિ રે તારુણી, આવડું રૂપ કયાંથી લાવી રે ? આ૦ ૧
દર્શન કરતાં દુખડાં ભાજે, સ્પર્શે પાતિક જાયે રે;
એ નારીની જાતને જાણે તેને આવાગમન નહિ થાયે રે. આ૦ ર
ઘડ્યું ઘરેણું એને રે હાથે, હાથે ભરી છે ચોળી રે;
સાળુડે ભાત નારીકુંજરની, કસુંબાના રંગમાં બોળી રે. આ૦ ૩
એને ગાને ગુણી ગાંધ્રવ મોહ્યા, તાંડવ નૃત્યને જાણે રે;
જળની ઝારી જુગતે ઝાલી મારા મંદિરિયામાં માણે રે. આ૦ ૪
કહીએ છીએ પણ કહ્યું ન માને, એ નારી નહીં, ગિરિધારી રે;
બ્રહ્મા, ઈંદ્ર, શેષ, શારદા એનાં ચરણ તણાં અધિકારી રે. આ૦ પ
વાસ કરે વૃંદાવન માંહે, હમણાં ગોકુલથી આવે રે;
નરસૈયાના સ્વામીને જોજો, એ તો નયણાંમાં નેહ જણાવે રે. આ૦ ૬
સ્રોત
- પુસ્તક : નરસિંહ મહેતાના શ્રેષ્ઠ પદ (પૃષ્ઠ ક્રમાંક 59)
- સંપાદક : શીવલાલ જેસલપુરા
- પ્રકાશક : નવભારત સાહિત્ય મંદિર
- વર્ષ : 1997