દેખંદા કોઈ આ દિલ માંય

દેખંદા કોઈ આ દિલ માંય, ઝણણણ ઝણણણ ઝણ ઝાલર વાગે.

બોલે બોલાવે સબ ઘટ બોલે, સબ ઘટમાં તો રહ્યો સમાય,

જિયાં જેવો તિયાં તેવો, થીર કરી થાણા દિયા ઠેરાય... ઝણણણ૦

નવે દરવાજા નવી રમત કા, દશમે મોહોલે ઓ દેખાય,

ઓઇ મેહેલમાં મેરમ બોલે, આપું ત્યાગે ઓ ઘર જાય... ઝણણણ૦

તાંત તાંત વિણ તૂંબે, વિના મુખે મોરલી રે બજાય,

વિના દાંડિયે નોબત વાગે, ઐસા હૈ કોઈ વા ઘર જાય... ઝણણણ૦

ઓઈ દૂકાને દડદડ વાગે, કર વિણ વાજાં અહોનિશ વાય,

વિના અરીસે આપા સૂઝે, વિના દીપકે જ્યોત જલાય... ઝણણણ૦

જાપ અજંપા સો ઘર નાંય, ચંદ સૂર ત્યાં પોંચત નાંય,

સૂસમ ટેકથી સો ઘર જાય, આપ આપને દિયે ઓળખાય... ઝણણણ૦

અખર અજીતા અરજ સુણજો, અરજ સુણજો એક અવાજ,

દાસી ‘જીવણ’ ભીમને ચરણે, મજરો માનો ગરીબ નિવાજ... ઝણણણ૦

dekhanda koi aa dil manya