રેખ્તા
હિન્દવી
સૂફીનામા
રાજસ્થાની
ચેતે તો ચેતાવું તને રે, પામર પ્રાણી? (ટેક)
સજી ઘરબાર સારું, મિથ્યા કહે મારું મારું;
તેમાં નથી કાંઈ તારું રે, પામર પ્રાણી! ચેતે તો0
તારે હાથે વપરાશે, તેટલું જ તારું થાશે;
બીજું તો બીજાને જાશે રે, પામર પ્રાણી! ચેતે તો0
માખીઓએ મધ કીધું, ન ખાધું ન ખાવા દીધું;
લૂંટનારે લૂંટી લીધું રે, પામર પ્રાણી! ચેતે તો0
ખંખેરીને હાથ ખાલી, ઓચિંતાનું જાવું ચાલી;
કરી માથાકૂટ ઠાલી રે, પામર પ્રાણી! ચેતે તો0
શાહુકારીમાં સવાયો, લખોપતિ તું લેખાયો;
કહે સાચું શુ કમાયો રે? પામર પ્રાણી! ચેતે તો0
આવે તારે સાથે એવો, કમાયો તું માલ કેવો?
અવેજ તપાસ તેવો રે, પામર પ્રાણી! ચેતે તો0
દેવે નરતન દીધી, તેં તો ન કિંમત કીધી;
મણિ સાટે મેશ લીધી રે, પામર પ્રાણી! ચેતે તો0
ખોળામાંથી ધન ખોયું, ધૂળથી કપાળ ધોયું;
જાણપણ તારું જોયું રે, પામર પ્રાણી! ચેતે તો0
હજી હાથમાં છે બાજી, કર તું પ્રભુને રાજી;
તારી મૂડી કર તાજી રે, પામર પ્રાણી! ચેતે તો0
હાથમાંથી બાજી જાશે, પછીથી પસ્તાવો થાશે;
કશું ન કરી શકાશે રે, પામર પ્રાણી! ચેતે તો0
મનનો વિચાર તારો, મનમાં રહી જનારો;
વળતી ન આવે વારો રે, પામર પ્રાણી! ચેતે તો0
નીસર્યો શરીર થકી, પછી તું માલેક નથી;
દલપતે કીધું કથી રે, પામર પ્રાણી! ચેતે તો0
સ્રોત
- પુસ્તક : આપણી કવિતાનો અમર વારસો (પૃષ્ઠ ક્રમાંક 44)
- પ્રકાશક : સસ્તું સાહિત્ય વર્ધક કાર્યાલય
- વર્ષ : 1964