ચાલો સખી! વૃંદાવન જઈએ

ચાલો સખી! વૃંદાવન જઈએ, જિહાં ગોવિંદ ખેલે હોળી;

નટવર વેશ ધર્યો નંદનંદન, મળી મહાવન ટોળી. ચા૦

એક નાચે, એક ચંગ વજાડે, છાંટે કેસર ઘોળી;

એક અબીર-ગુલાલ ઉડાડે, એક ગાય ભાંભર-ભોળી. ચા૦

એકએકને કરે છમકલાં, હસી હસી લે કર તાળી;

માંહોમાંહે કરે મરકલા, મધ્ય ખેલે વનમાળી. ચા૦

વસંતઋતુ વૃંદાવન પ્રસરી, ફૂલ્યો ફાગણ માસ;

ગોવિંદ-ગોપી રમે રંગભર, જુએ નરસૈયો દાસ. ચા૦

chaalo sakhii! vrundavan jaiye