ભલે રે સર્જ્યાં અમો લોક ભરવાડાં

ભલે રે સર્જ્યાં અમો લોક ભરવાડાં,

નિત્ય વલોણું વલોવતાં રે લોલ.

લખ ધેન ગોઠ બાવા નંદ ઘેર દૂઝે,

મેરુ રવૈયો ઘાલી રે લોલ. ભલે...

એકી પા ઘૂમે રાધિકા રે ગોરાં.

એકી પા કાનજી કાળા રે લોલ. ભલે...

હળવા હળવા ઘૂમજે રે કાનજી,

ગોળી નંદાશે મારી રે લોલ. ભલે...

ગોળી નંદાશે ને ચોળી છંટાશે,

તૂટશે મોતીની માળા રે લોલ. ભલે...

કાળીનાગનાં નેતરાં રે કીધાં,

મેરુ કીધો રવૈયો રે લોલ. ભલે...

સાત સાહેરની ગોળી રે કીધી,

ને ચંદો સૂરજ બે સાખી રે લોલ. ભલે...

ભલે મળ્યો નરસૈંયાનો સ્વામી,

સાત સાહેર વલોવતાં રે લોલ. ભલે...

bhale re sarjya amo lok bharvada