રેખ્તા
હિન્દવી
સૂફીનામા
રાજસ્થાની
ભક્તિ એવી રે ભાઈ એવી, જેમ તરસ્યાંને પાણી જેવી
bhakti aevii re bhaii aevii, jem tarashyaanne paani jevii
કલ્યાણ
ભક્તિ એવી રે ભાઈ એવી, જેમ તરસ્યાંને પાણી જેવી;
એક ગોધન ચરવાને જાય, એની સુરતા વાછરડાં માંય;
ચરણે ફરવું ને ચોદિશ રહેવું, એવું હરિચરણે ચિત્ત ધરવું. ભક્તિ0
એક યુવતી જળ ભરવાને જાય, સામી સખીઓથી વાતો થાય;
માથે બેડું ને લે છે તાળી, મુખે હસે છે વારી વારી;
બેડું ચિત્તથી નથી રે વીસરવું, એવું હરિચરણે ચિત્ત ધરવું. ભક્તિ0
એક ભ્રમર કમળમાં રહે છે, તેને વાસના કેવી ગમે છે?
સાંજ પડીને કમળ બિડાયું, અકળાયો ને ક્યાંય ના જવાયું;
એને કમળની પ્રીતે રે મરવું, એવું હરિચરણે ચિત્ત ધરવું. ભક્તિ0
એક ચોર તે ચોરી કરે છે, પરમંદિરે ફેરા ફરે છે;
વળી માઝમ રાત અંધારી, મૂરખ ડરતો નથી રે લગારી;
પારકું ધન પોતાને રે હરવું, એવું હરિચરણે ચિત્ત ધરવું. ભક્તિ0
બપૈયાને વરસાદ વહાલો, એવી પ્રેમભક્તિ તમે ઝાલો;
ચકોર ચિત્ત ચંદ્રમાં ઘાલે, અણપેખતાં દૃષ્ટિને બાળે;
કહે કલ્યાણ એથી ન ઊતરવું, એવું હરિચરણે ચિત્ત ધરવું. ભક્તિ0
સ્રોત
- પુસ્તક : આપણી કવિતાનો અમર વારસો (પૃષ્ઠ ક્રમાંક 25)
- પ્રકાશક : સસ્તું સાહિત્ય વર્ધક કાર્યાલય
- વર્ષ : 1964