એ જી તારો આવ્યો અવસર ભેળાણો રે

એ જી તારો આવ્યો અવસર ભેળાણો રે,

રાહોલ માલા, તમે જાગો જુગના જૂના જોગી રે.

એ જી માલદે, ઘરે રે ઘોડા 'ને તમે પાળો કેમ હાલશો રે?

એ જી તમે ઘોડલે ચડીને વ્હેલા આવો રે... રાહોલ માલા.

એ જી માલદે, સાધુડાના ઘરમાં ચોરી નવ કરીએ રે,

એ જી જે રે જોઈએ ઈ માંગી લઈએ રે... રાહોલ માલા.

એ જી માલદે, ઊંડા જળની આળ્યું નવ કરીએ રે,

એ જી એના કાંઠે બેસીને ન્હાઈ લઈએ રે... રાહોલ માલા.

એ જી માલદે, પર રે નારીનો સંગડો નવ કરીએ રે,

એ જી એને બેન કહીને બોલાવીએ રે... રાહોલ માલા.

એ જી માલદે, સોના કેરી નગરી 'ને રૂપા કેરા ધાગા,

એ જી એને કાંટાની વાડ્યું ગણીએ રે... રાહોલ માલા.

એ જી માલા, દોય કર જોડી 'રાણી રૂપાંદે' બોલિયાં,

એ જી મારા સાધુડાનો બેડલો સવાયો રે... રાહોલ માલા.

ae jii taaro aavyo avsar bhelaano re