રેખ્તા
હિન્દવી
સૂફીનામા
રાજસ્થાની
મારી નાડ તમારે હાથ, હરિ સંભાળજો રે. (ટેક)
હરિ મને પોતાનો જાણીને પ્રભુપદ પાળજો રે. મારી0
અનાદિવૈદ આપ છો સાચા, કોઈ ઉપાય વિષે નહિ કાચા;
વધુ ન ચાલે વાચા, વેળા વાળજો રે. મારી0
પથ્યાપથ્ય નથી સમજાતું, દુઃખ સદૈવ રહે ઊભરાતું;
મને હોય જે થાતું, નાથ નિહાળજો રે. મારી0
વિશ્વેશ્વર ના મને વિસારો, આપને હાથ છું પાર ઉતારો;
મહા મુઝારો મારો, નટવર ટાળજો રે. મારી0
કેશવ હરિ, મારું શું થાશે? ઘાણ વળ્યો જો ગઢ ઘેરાશે;
લાજ તમારી જાશે, ભૂધર ભાળજો રે. મારી0
સ્રોત
- પુસ્તક : આપણી કવિતાનો અમર વારસો (પૃષ્ઠ ક્રમાંક 6)
- પ્રકાશક : સસ્તું સાહિત્ય વર્ધક કાર્યાલય
- વર્ષ : 1964