રેખ્તા
હિન્દવી
સૂફીનામા
રાજસ્થાની
અંગરખું એક તારું રે... બનાવ્યું બહુ જુગતિ કરી;
સીવનારો દરજી ડાહ્યો રે... ભૂલ એમાં ના’વે જરી. અંગ0
કારીગરી કેવી કીધી છે, (જેનો) કે’તાં ન આવે પાર;
બારીક કામ કરેલું બહુ છે, તાણ્યા ઉપર તાર;
ટાંકો નજરે ના’વે રે... ધારીને જુઓ સુરતા ધરી. અંગ0
સુંદર ઘાટ બનાવ્યો સારો, શોભા બની અપાર;
વાળવું હોય તેમ વળે બરાબર, એવું કોઈ નથી કરનાર;
કળીઉં એવી કીધી રે... નજર સહુની રહે છે ઠરી. અંગ0
કમરપટો કોઠો ને કોણી, પૂરણ બન્યું પ્રમાણ;
ફાટે તો સંધાય સ્વભાવે, એવો સરજનહાર સુજાણ-
પરમાણું એવું કીધું રે... બેસતું આવ્યું બરા રે બરી. અંગ0
અંગરૂપ અંગરખું બન્યું (ને) પૂર્યો પ્રાણ પ્રકાશ;
દય જુઓ દરજી તણી, સીવતાં થયાં નવ માસ-
દાસ ‘રણછોડ’ને રે... પહેરાવ્યું પ્રભુ ખરા રે ખરી. અંગ0
સ્રોત
- પુસ્તક : આપણી કવિતાનો અમર વારસો (પૃષ્ઠ ક્રમાંક 28)
- પ્રકાશક : સસ્તું સાહિત્ય વર્ધક કાર્યાલય
- વર્ષ : 1964