રેખ્તા
હિન્દવી
સૂફીનામા
રાજસ્થાની
આત્મતત્ત્વ શોધો રે, જ્ઞાનીજન ગોતો ઘટમાં!
બોલે તે નહિ બીજો રે, ઓળખી લેજો અંતરમાં... આત્મ૦
વિશ્વંભર દરિયો સભર ભરિયો, માંહી રવિ-શશિ તેજની જ્યોતિ,
શૂરા-પૂરા એ જળમાં ઝંપલાવે, કોઈ મરજીવા લાવે મોતી!
કોઈ પહેરે પનોતી રે અખંડ ચૂડલા કરમાં... આત્મ૦
કાગડા, બગલા કાંઠે રહેવે, વસ્તુ હાથ ન આવે આરે,
માન સરોવર માંહી મુક્તાફળ કોઈ હંસ ચારે તેને ચારે!
ક્ષીર ને નીર ભેળાં રે જૂજવાં કરી પીએ પળમાં... આત્મ૦
સદ્ગુરુ-સંગતમાં જે જન સમજે, તેનું નિશ્ચે થશે કાજ,
દર્પણમાં તન દીસે પોતાનું, એમ માંહેથી મહારાજ!
પોતાને પોતે પરખે રે, જે ભર્યો સભરાભરમાં... આત્મ૦
હરિ-ગુરુ-સંત સ્થિર રૂપ તે, જંત્ર વાજિંત્ર બજાવે,
શબ્દ ઘટાવી લક્ષમાં ડોલે, હરિનાદે નામ ચિત્ત આવે!
'ધીરા' સુખસાગર રે નીરખો નિજ અંતરમાં... આત્મ૦
સ્રોત
- પુસ્તક : પરિચિત પદસંગ્રહ (પૃષ્ઠ ક્રમાંક 165)
- પ્રકાશક : સસ્તું સાહિત્યવર્ધક કાર્યાલય
- વર્ષ : 1946
- આવૃત્તિ : ત્રીજી આવૃત્તિ