રેખ્તા
હિન્દવી
સૂફીનામા
રાજસ્થાની
આતમાને ઓળખ્યા વિના રે, લખ ચોરાશી નહીં તો મટે રે જી
ભ્રમણાને ભાંગ્યા વિના રે, હે જી ભવના ફેરા નહીં રે ટળે રે જી
- એવા આતમાને ઓળખ્યા વિના રે૦
કોયલ ને કાગ રે, રંગે રૂપે એક છે હો જી
ઈ તો એની બોલી થકી ઓળખાય રે...
- એવા આતમાને ઓળખ્યા વિના રે૦
હંસલો ને બગલો રે, રંગે રૂપે એક છે હો જી
ઈ તો એના ચારા થકી ઓળખાય રે...
- એવા આતમાને ઓળખ્યા વિના રે૦
સતી ને ગુણકા રે, રંગે રૂપે એક છે હો જી
સતી રાણી સેવા થકી ઓળખાય રે...
- એવા આતમાને ઓળખ્યા વિના રે૦
ગુરુના પરતાપે રે, ‘બાઈ મીરાં’ બોલિયાં હો જી
દેજો અમને સંત ચરણમાં વાસ રે...
- એવા આતમાને ઓળખ્યા વિના રે૦
સ્રોત
- પુસ્તક : મધ્યકાલીન ગુજરાતી ભક્તિકવિતા સંચય (પૃષ્ઠ ક્રમાંક 129)
- સંપાદક : ડૉ. નિરંજન રાજ્યગુરુ
- પ્રકાશક : સાહિત્ય અકાદેમી
- વર્ષ : 2010