આંબો અમર છે રે સંતો

આંબો અમર છે રે સંતો

આંબો અમર છે રે સંતો!

કોક ભોમને ભાવે રે

આંબો અમર છે રે સંતો!

ધરતી તપાસી ધરા ખેડાવો, કામનાં કૂંડાં કાઢો,

નિજનામનાં બીજ મંગાવી, વિગતેથી વવરાવો રે.

હો સંતો આંબો અમર છે રે...

અકળ ધરાથી ઘડો મંગાવી, હેતની હેલ્યું ભરાવો,

નૂરત-સૂરત દો ખડી પનિહારી, પ્રેમ કરીને પીવરાવો.

હો સંતો આંબો અમર છે રે...

કાચા મોર તો ખરી જાશે, ફૂલ ફળ પછી આવે,

હુકમદાર બંદા હાલે હજૂરમાં, ખરી નીત સે ખાવે.

હો સંતો આંબો અમર છે રે...

કાચાં ભડદાં કામ નૈં આવે, જીરાવ્યા કેમ જીરવાશે?

ત્રણ ગુણનો ટોયો રખાવી, જાળવો તો જળવાશે.

હો સંતો આંબો અમર છે રે...

ધ્યાન ધરીને ધરા તપાસી, ભાણસાહેબ છે ભેળા,

દાસ 'મોરાર'ને રવિગુરુ મળિયા, જેણે વરતી લીધી વેળા.

હો સંતો આંબો અમર છે...

aambo amar chhe santo