રજા ત્યારે હવે, દિલબર! અમારી રાત થઈ પૂરી,
મશાલો સાવ બૂઝી, તેલ ખૂટ્યું, વાત થઈ પૂરી;
                           અમારી રાત થઈ પૂરી.

ભરાયો  જામ  રાત્રિનો  ઉપર  તરતા  હતા તારા,
ગયા ડૂબી બધા, ડૂબ્યો વળી મહેતાબ  આસ્માને;
તમારો કંઠ થાક્યો, ગાન  થંભ્યું,  વાત  થઈ પૂરી,
                             અમારી રાત થઈ પૂરી.

અનેરી એક રાત્રિની અમે  માગી હતી મહોબત,
સવારે તો જવાનું હા! જુઓ વાગી રહી નોબત;
અમારી  ઊપડી વણજાર,  હારો  ઊંટની ચાલી,
                           અને છેલ્લી હવે પ્યાલી-

હવે છેલ્લી ચૂમી ને ભૂલવી આ બેહિસ્તની ઝાંખી,
તમારા  પેરની  હિના,  ગુલાબી  ઓઠની   લાલી.
ભૂલી જાવી બદન કેરી  અહા!  અણમોલ  કસ્તૂરી,
અમી ખૂશ્બો, અને સુરખી તમારી  આંખની ભૂરી,
                              અમારી રાત થઈ પૂરી.

જુઓ મસ્જિદ-મિનારે એ ઝલક આફતાબની આવી;
પુકારે  બાંગ  મુલ્લાં  મસ્ત  રાગે,  વાત  થઈ   પૂરી,
                                 અમારી રાત થઈ પૂરી.

અમે જઇશું ત્યહાં, દિલબર!   નહિ સાકી, નહિ શરબત,
ન આ જુલ્ફો તણી ખૂશ્બો,  નહિ મ્હેફિલ, નહિ લિજ્જત;
અમે મિસ્કીન મુસાફર - ગાનના શોખીન - નહિ ઇજ્જત.

અમારા રાહ જુદા ને  છતાં આ દર્દ કાં થાતું?
તમારા ગાનમાં ડૂબી   જિગર મારું થયું ગાતું,
                       અને આ વાત થઈ પૂરી,

રજા ત્યારે હવે, દિલબર! અમારી રાત થઈ પૂરી.