રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો

રજિસ્ટ્રેશન કરો

મૃત્યુ

હરીન્દ્ર દવે

મૃત્યુ

હરીન્દ્ર દવે

મ્હેકમાં મ્હેક મળી જાય, તો મૃત્યુ ન કહો,

તેજમાં તેજ ભળી જાય, તો મૃત્યુ ન કહો,

રાહ જુદો જ જો ફંટાય, તો મૃત્યુ ન કહો,

શ્વાસની લીલા સમેટાય, તો મૃત્યુ ન કહો.

દીર્ઘ યાત્રાની જરૂરતથી સજ્જ થઈ જઈને,

એક મંઝિલની લગન આંખે ઊતરવા દઈને,

ભાનની ક્ષણને કાળજીથી સમેટી લઈને,

‘આવજો’ કહીને કોઈ જાય, તો મૃત્યુ ન કહો.

જે નરી આંખે જણાયાં ન એ તત્ત્વો કળવા,

જે અગોચર છે એ અસ્તિત્વને હરદમ મળવા,

દૂર દુનિયાનાં રહસ્યોનો તાગ મેળવવા,

દૃષ્ટિ જો આંખથી છલકાય તો મૃત્યુ ન કહો.

શબ્દ ક્યાં પહોંચે છે તે જાતે નીરખવા માટે,

ભાનની સૃષ્ટિની સીમાને પરખવા માટે,

દિલના વિસ્તારી દુનિયાઓમાં વસવા માટે,

કોઈ મહેફિલથી ઊઠી જાય, તો મૃત્યુ ન કહો.

સ્રોત

પુસ્તક : હયાતી (પૃષ્ઠ ક્રમાંક 28)
સંપાદક : સુરેશ દલાલ
પ્રકાશક : ચીમનલાલ લિટરરી ટ્રસ્ટ
વર્ષ : 1984
આવૃત્તિ : (બીજી આવૃત્તિ)