રેખ્તા
હિન્દવી
સૂફીનામા
રાજસ્થાની
લ્યો, આવજો ત્યારે,
અહીંથી અલ્વિદા.....
તમારા સાથની સીમા અહીં પૂરી થતી.
જુઓ, આ શ્વાસ પણ અટકી ગયા છે ફૂલના–
તમારી હૂંફને ડગલું ય આગળ માંડવાની છે મના!
જરા પાછું વળી જોયું–
તમારી વહેલને છેડે લટકતો ડોલતો દીવો
‘ના ના’ કહેતો’તો
છેલ્લી પળોને દાબતી ભીની હથેલીના સમો!
નિસ્પંદ આ સીમાંત વૃક્ષે
કાળ પાંખો બીડીને થીજી ગયો,
એકાન્તને અંગે લપેટી સર્પતો અંધાર પણ
અહીં ગૂંછળું થઈ ને કશો થીજી ગયો!
શિશુની આંખના ડૂમા સમો આ પંથ.....
વિસામાની હવે કોઈ રહી ના ખેવના
તમારી હૂંફને ડગલું ય આગળ માંડવાની છે મના.
–જુઓ, આ શ્વાસ પણ થંભી ગયા છે ફૂલના!
સ્રોત
- પુસ્તક : પૂર્વા (પૃષ્ઠ ક્રમાંક 53)
- સર્જક : રમેશ જાની
- પ્રકાશક : અક્ષરા (મુંબઈ) પ્રકાશન
- વર્ષ : 1984