શિશિરની રાત-૨ (યૌવનની નજરે)

આ શિશિરની રાત!

મસ્તાન મોસમની મળી સોગાત!

તરવર થતા પ્રત્યંગમાં સંગીતના શા તાલ!

નસનસમહીં

ઉષ્માસભર વેગેભર્યા

આ રક્તની શી ઠેક દેતી ચાલ!

કેટલી રળિયાત!

આ શિશિરની રાત!

ટક્ ટક્ થતી

(કા મધુરતમ સૂરીલ ગીતની ધ્રુવકડી)

ઘડિયાળ વેગે રાસ રમતી!

ને નશામાં ચૂર ચખ રમણે ચઢેલાં!

નૃત્ય કરતાં અંગ આ સોને મઢેલાં,

અંધારનું અત્તર લગાવી

સ્વપ્નનું બિસ્તર બિછાવી

જિંદગીને સોડમાં લઈ

ખોઈ બેઠાં જાત!

આ શિશિરની રાત!

જાગરણ (જાણે છલકતો આરજૂનો જામ)

ને નિંદ (જાણે તૃપ્તિનો પયધૂંટ)

ની પાંખે વિહરતી

આ યુવા ના ગાત

હોત ના જો આ શિશિરની રાત!

shishirnii raat (yauvannii najare)