શિશિરની રાત-૧ (વાર્ધક્યની નજરે)

આ શિશિરની રાત,

રકત પણ થીજી ગયું (ના હોય પક્ષાઘાત!)

થરથર થતા પ્રત્યંગમાં કળતર કશી!

ને આગની ઠંડી અરે બળતર કશી!

દેહ પર ઉપસી નસોની ને રૂંવાની ભાત,

ના જીરવાયે આ શિશિરની રાત.

ટક્ ટક્ થતી

(કુભારજાની કો સતત લવરી સમી)

ઘડિયાળ જાણે હાંફતી

થાકી જતી ડગ એક કેમે માંડતી!

ને ગોદડીમાં ટૂંટિયું વાળી

વીંટેલા દેહને

(હૂંફમાં પડખે પડ્યું છે શબ

વીતેલા રંગભર આયુષ્યનું)

ના નિંદ કે ના જાગૃતિ,

ના સ્વપ્નની કો ઝંકૃતિ.

એની પ્રલયચકકી મહીં-

જેહનો ઘર્ઘર ધ્વનિ

સંભળાય છે સુસવાટમાં-

અહ, ઓરતી આ ગાત!

આ શિશિરની રાત.

shishirni raat-1 (vaardhakynii najare)