નામ લખી દઉં

નામ લખી દઉં

ફૂલપાંદડી જેવી કોમળ

મત્ત પવનની આંગળીએથી

લાવ, નદીના પટ પર તારું નામ લખી દઉં!

અધીર થઈને કશુંક કહેવા

ઊડવા માટે આતુર એવા

પંખીની બે પાંખ સમા તવ હોઠ જરા જયાં ફરકે...

ત્યાં તો જો—

આ વ્હેતા ચાલ્યા અક્ષરમાં શો

તરંગની લયલીલાના કલશોર મદીલો ધબકે...

વક્ષ ઉપરથી

સરી પડેલા છેડાને તું સરખો કરતાં

ઢળી પાંપણે ઊંચે જોતી

ત્યારે તારી માછલીઓની

મસ્તી શી બેફામ...

લાવ, નદીના તટ પર ઠામેઠામ લખી લઉં.

તવ મેંદી રંગ્યાં હાથ,

લાવને, મારું પણ ત્યાં નામ લખી દઉં!

nam lakhi daun