રેખ્તા
હિન્દવી
સૂફીનામા
રાજસ્થાની
ને એ જ તું?
ne ae j tun
રાજેન્દ્ર શાહ
રાજેન્દ્ર શાહ
એ તું જ? જેની
હથેલી તો નાગરવેલ કેરા
કૉળેલ કોઈ નવ પણ જેવી
સ્પર્શી હતી શીતલ લાલિમા ભરી?
ને એ જ તું?
જે કાંટાળે લહું આ શતશત શૂલથી વીંધનારો થુવેર?
એ તું જ? જેની
વાણી મહીં સંગીત કિન્નરી મેં
માણ્યું હતું (ગુંજરતો વહ્યો ધ્વનિ
તરંગઆવૃત્ત અનંત શાન્તિમાં)?
ને એ જ તું?
જેનાં ગર્જંત મૌને નિખિલ સકલ કોલાહલે વ્યગ્ર કીધું?
એ તું જ? જેની
દૃગો સુધા વર્ષતી પૂર્ણચંદ્રની,
અંધારનેયે મળી જેની શુભ્રતા,
સમષ્ટિને અંતર ગૂઢ સંમુદા?
ને એ જ તું?
જે વિદ્યુત્ શી અજંપે ભ્રમણ મહીં કરે સર્વ કૈં ભસ્મસાત?
સ્રોત
- પુસ્તક : કાવ્ય-કોડિયાં – રાજેન્દ્ર શાહનાં કાવ્યો (પૃષ્ઠ ક્રમાંક 18)
- પ્રકાશક : લોકમિલાપ ટ્રસ્ટ