કેમે કર્યો આ હાથ

કેમે કર્યો આ હાથ

ફૂલનો ગુચ્છો લઈને એક ડાળી પાતળી

રોજ બારીમાં રહે છે ઝૂમતી –

હાથ ફેલાવું અને

આવી પડે –

એટલું – બસ એટલું અંતર,

કેમે કર્યો પણ હાથ ફેલાયો નહિ.

એક અણિયાળું શિખર

મુજ આંખને તેજલ તળાવે

રોજ તરવા ઊતરે –

કાંઠે પડેલો હાથ તરસ્યો તાકતો એવી રીતે

કેમે કર્યો પણ હાથ લંબાયો નહિ.

ક્યારેક તો મુજ શીર્ષને સ્પર્શી જતું

આકાશ આવે છે ઝૂકીને એટલું નીચું –

એક્કેય પણ તે તારલાને ચૂંટવા

કેમે કર્યો આ હાથ ઊંચકાયો નહિ.

Keme Karyo Aa Hath