રેખ્તા
હિન્દવી
સૂફીનામા
રાજસ્થાની
જુમ્મા મસ્જિદ
jumma masjid
ઉદયન ઠક્કર
ઉદયન ઠક્કર
(વનવેલી)
અણહિલવાડમાં અલ્લાઉદીને બનાવેલી
આરસની મસ્જિદમાં
એટલા તો થાંભલા
એટલા તો થાંભલા
નમાઝીઓ ગણતા જાય ને ભૂલતા જાય
વીસ વીસની કતાર, એવી ચાર.....
અને પેલા એકસો પચાસનું શું?
મિનારાથી ફરી ગણો
કિતાબમાં શું લખ્યું છે?
નાસેહ કહે તે ખરું
એકી અને બેકી એવા ફિરકાઓ પડી ગયા
કોઈ કહે, અસલ તો આટલા
બીજાને આધાર ક્યાં છે?
નમાઝીઓ વજૂ કરે
હાથ ધોઈને પાછળ પડી જાય
રજૂ કરે
પોતપોતાનો હિસાબ
મણકાઓ ગણે
એકસો ને આઠ કી સાતસો ને છિયાસી
અણહિલવાડમાં અલ્લાઉદીને બનાવેલી
આરસની મસ્જિદમાં
એટલા તો થાંભલા
એટલા તો થાંભલા
નમાઝી ઓ ભૂલી જાય સિજદોયે કરવાનું
સ્રોત
- પુસ્તક : ગુજરાતી કવિતાચયન 2009 (પૃષ્ઠ ક્રમાંક 4)
- સંપાદક : રાજેશ પંડ્યા
- પ્રકાશક : ગુજરાતી સાહિત્ય પરિષદ
- વર્ષ : 2012