રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો
રજિસ્ટ્રેશન કરો
રેખ્તા
હિન્દવી
સૂફીનામા
રાજસ્થાની
ઝંઝા
jhanjha
મૂકેશ વૈદ્ય
મૂકેશ વૈદ્ય
દૃગાન્ત લગ છે કાદવ કાદવ
શીંગડીઓ ઉલ્લાળી આભે ચડે બીજનો ચાંદો.
ઘનઅંધારા લઈ ધસમસતો મહિષ આભલે,
એક કોરથી બીજી લગણ જઈ દૂર છલાંગે,
ટોચ ઉપરથી કૂદતો નીચે ભોંયે માથું પટકે.
ઘરની ભીંતો પડું પડું
ને ઘરમાં ઊછળ્યા સદીઓથી ગોંધેલા પૂરના ઘોડા
બ્હાર બધે બધ મેઘફુવારે દળવાદળમાં હિંસ્ર અવાજે તિમિર ત્રાટકે
એક ઝાટકે અંદર પણ હાં, જળમાં જાગે જનમ જૂનો આવેગ.
આંગણિયે ધસમસતો ચાંદો
ચસચસતા કાદવિયે તીણાં શીંગ અફાળી
કચ્ચર કચ્ચર ભીંતનો ફેંકે દિશ દિશમાં ભંગાર.
જળનો જનમ જૂનો ઉન્માદ વછૂટે તીર શો આઘે.
કલકલ વહેતી લીલોતરી પણ સરકે આઘે.
આઘે આઘે
નભ થલ વચ્ચે અબ લગ ઝગતો હીરનો દોર અલોપ.
દૃગાન્ત લગ છે પાણી પાણી
શીંગડીઓ ઉલ્લાળી આઘે સરે બીજનો ચાંદો.
સ્રોત
- પુસ્તક : જુગલબંધી (પૃષ્ઠ ક્રમાંક 84)
- સંપાદક : ઉદયન ઠક્કર
- પ્રકાશક : નવભારત સાહિત્ય મંદિર
- વર્ષ : 1995