ઊગ્યું પ્રભાત નમણું
Ugyu Prabhat namanu
રામપ્રસાદ પ્રેમશંકર બક્ષી
Ramprasad Premshankar Bakshi
રામપ્રસાદ પ્રેમશંકર બક્ષી
Ramprasad Premshankar Bakshi
ઊગ્યું પ્રભાત નમણું નયનોય ખૂલ્યાં
દીઠાં સુરમ્ય સુમનો દ્રુમવેલ ખીલ્યાં
મીઠા સુણ્યા કલનિનાદ વિહંગમોના
માણ્યા સુહૃદસ્વજનના ઉરભાવ મોંઘા-
ઊગી ઉષા અવર, બે નયનોય ખૂલ્યાં
ને સૃષ્ટિ અંકમહીં ઝૂલી રહ્યાં રસીલાં.
મધ્યાહ્નનો રવિ તપ્યો; ઉરતાપ વાધ્યો :
- આરામ તપ્ત ઉરને અભિરામ લાધ્યો.
છાયા રચી રહી શિરે અમરાઈ ઘેરી
માણી તદા મધુરતા ઋતુરાજ કેરી -
પ્રેમપ્રમોદ સહકારતણો પિછાણ્યો
શીળો ઉરદ્વય તણો સહચાર માણ્યો.
સંધ્યા નમી; હૃદયના પરિતાપ શામ્યા
ને શાન્ત સાત્ત્વિક સમુન્નત ભાવ ભાવ્યા;
થાક્યા હતા ચરણ ને હતું ચિત્ત થાક્યું
વિશ્રામ કાજ નિજ ધામ પ્રયાણ વાંછ્યું-
ક્યારે હવે અમિત ઓઢણ આભ ઓઢી
પંચક પાવક પરે સખિ જઈશું પોઢી
સ્રોત
- પુસ્તક : કવિતા - ઑક્ટોમ્બર, 1978 (પૃષ્ઠ ક્રમાંક 129)
- સંપાદક : સુરેશ દલાલ
- પ્રકાશક : જન્મભૂમિ પ્રકાશન, મુંબઈ
