રેંટિયો કાંતતાં કાંતતાં

આ સૃષ્ટિના સકલ સંચલને નિમગ્ન

કો બાહુને સતત પ્રેરત આદ્યતત્ત્વ

એ તત્ત્વ આ યરવડા તણું કાષ્ટચક્ર

–જે યજ્ઞરૂપ, નિત એહ ચલાવતા તે

આ માહરા બાહુ વિષે વસ્યું છે.

આ દીર્ઘ ચક્ર, અતિ ઉગ્ર, અહો શું સૂર્ય,

એ સત્ય; ને લઘુક જે વળી ચક્ર, શાંત,

એ ચન્દ્ર શું, પ્રગટ મૂર્તિમતી અહિંસા;

ને આસપાસ અહીં ગુંજનમાં રચાતો

સંવાદ, એ સકલ તારકવૃંદ, પ્રેમ.

ત્યાં દૂર ચક્રમુખ માંહી વસ્યું છ સ્વર્ગ,

ને સૂત્રના સકલ તાર વિષે છ ગંગા;

ત્યાં જે વસ્યો મુજ ભગીરથ અન્ય બાહુ

એના પ્રયત્નબલથી નિત જે વહી ર્હૈ;

એથી જ પાવન થતું પૃથિવીનું તીર્થ.

હું એક બાહુ થકી અંજલિ કર્મરૂપ

અર્પી રહું નિત અનાદિ અનંત પ્રત્યે,

એ ચિત્તનો હૃદયનો મુજ પૂર્ણયોગ;

ને અન્ય બાહુ થકી આશિષ એહની હું

ઝીલી રહું...

Rentio Kantata Kantata