રેખ્તા
હિન્દવી
સૂફીનામા
રાજસ્થાની
(રોલાવૃત્ત)
સલામ રે દિલદાર, યારની કબૂલ કરજે;
રાખીશ મા દરકાર, સાર સમજી ઉર ધરજે.
ઘણા ઘણા લઈ ઘાવ, તાવથી ખૂબ તવાયાં;
નહિ ભોગ પર ભાવ, નાવમાં નીર ભરાયાં.
સરખે સરખી જોડ, કોડના બંને માર્યાં;
છૂટી પડી ગઈ સોડ, હોડમાં બંને હાર્યાં.
સખી પરસ્પર બોજ, રોજ સંગાતે રમતાં;
ગયો ખાલી થઈ હોજ, મોજ શી શીરે જમતા!
એક અંગીનાં અંગ, નંગ કુંદન બન્યો છે;
છાજ્યો નહિરે સંગ, રંગમાં ભંગ થયો છે.
ઝૂરે તું કહાં પડી દૂર, ઝૂરતો હું અહીં રોજે;
ઊતરી ગયાં છે નૂર, ઉર ફાટે છે સોજે.
પરસ્પરે છે પ્રીત, રીત રાખી છે સારી;
ખરેખરાં દુ:ખી નિત, ચીતમાં ચિંતા ભારી.
મળવાની શી વાત, રાતની રાહ બહુ પાજી;
ખાઇ ઠોકર લાત, જાત રિબાયે ઝાઝી.
રોયાં કરવું આમ, કામ તેથી શું સરતું?
(રે) હજીયે બાળે કામ, જામ આઠે શિર ફરતું.
લવીએ પ્યારૂં નામ, રામનું નામ ન લઇએ;
ઈશ્ક કેફનાં જામ, આમ દૂર કેમ જીરવીએ?
પ્રેમતણી ભલી નાવ, આવજાવો કરી તેથી;
મોટો લીધો લ્હાવ, રાવ નિભાયું ન બેથી.
ચાલ્યું થોડીવાર, માર વિધવિધ બહુ ખાધો;
ડરી હઠ્યાં ન લગાર, પ્યાર તસતસ વધુ બાંધ્યો.
જીભે રહેલો સ્વાદ, આદ ગળકો જે લાગ્યો;
આપણને તે યાદ, નાદથી ઝાઝો માગ્યો.
મળ્યો ન માગ્યો તેહ, કેહ શું બાકી રાખી;
ભાગ્યમાં નહિ જેહ, રહે ચાલુ ક્યમ આખી?
હવે રહ્યું છે એ જ, સ્હેજ જો છૂટવું મોતે;
જો ઊંચે ચિદ તેજ, તેજ સુખ હશે પોતે.
સ્રોત
- પુસ્તક : શ્રેષ્ઠ નર્મદ (પૃષ્ઠ ક્રમાંક 27)
- સંપાદક : રમણ સોની
- પ્રકાશક : ગૂર્જર ગ્રંથરત્ન કાર્યાલય
- વર્ષ : 2023